Дөрвөн уулын дунд өрнөх хөл хөдөлгөөнтэй, шуугиантай хотын амьдралаас холдож, өмнийн говьд ирсэн эхний өдөр. Цэлийсэн тал, хязгааргүй цэнхэр тэнгэр, зуны бүгчим халуунд суурьшихаар нүүж ирсэн тэр мөч...

Алтан навч хийслээ дээ
Аяны шувууд буцлаа даа
Есөн сарын нэгэн боллоо
Ерөөсөө бидний баяр даа

Энэ л дууг хүүхэд бүр дуулан угтахад зарим хүүхэд анхны намраа, нөгөө нь  12 дахь намраа угтаж байсан бол би багш болсон анхны намраа угтаж байв. Зураг дээр байгалийн ухааны багш нарын хамт

Сандрал дүүрэн бас догдлолтой  хичээлийн эхний өдөр. 10 дугаар ангид “Газарзүйн тусгаг” сэдвээр хичээл ороод, багшаа багшаа хэмээн дуудуулсан эхний өдөр өнгөрөв.

Багш нарт хамгийн хэрэгтэй бичгийн цаас, шохой зэргийг энэхүү бичиг хэргийн зардал гэх 83000 төгрөгөнд таруулан худалдан авалт хийлээ. 

Хаяа хаяахан тог нь тасрах сумын амьдрал, одоогоор удаан тог тасраагүй л байна. Өө тог тасарчихлаа гээд гэрлээ, лаагаа асаагаад суугаад байж байтал удахгүй хүрээд ирнэ. Мөн  зурган дээр харагдаж байгаа гэр интернетийг өгсөн Unitel-дээ баярлалаа

Сурагчийн ширээний ард суудаг байсан үе минь саяхан мэт санагдах би анхны багш нарын баяраа тэмдэглэв. Өдөржин л сурагчид маань таныг 12 дугаар анги гэж харлаа гээд л ёстой хөөрхөн

Дандаа л  цэх суугаад дасгалаа хийдэг. Нэг удаа тухтайгаараа суугаарай гэтэл бүгд хэвтээд өгөв. Тэр 2-р салааны хоосон харагдаж байгаа ширээн дээр суудаг нөхөр бүр сандал дээрээ хэвтээд өгөв.

Говьд амьдарч байгаа учир тэмээний баяр үзлээ. Баяр дээр очвол тэмцээнд оролцож гоё сайхнаа харуулах гэж байгаа сүрлэг сайхан тэмээнүүдийг харж мөн сүү, цагаан идээнээс идэж үзэх боломж олдоно.

Багш нарын баяр болон 3 сарын 8-ны өдөр сурагчидаас маань өгсөн цэцэг. Насан туршдаа хадгалах нандин бэлэг.

Суманд ирсэнээс хойш шуудан ирэх үеийн мэдрэмж их гоё санагддаг болсон доо. 2 жилийн турш байнгийн минь хаяг Өмнөговь аймаг,  Цогтцэций сум, Мөрөөдөл сургууль

Өдөр бүр маш завгүй мэт өнгөрөх эдгээр өдрүүдийн ард гарсаар байгаа миний багшаа гэж дуудуулах өдрүүд...